Drive In Ultra，我第一次聽已經好興奮，香港未做過唔知大家嘅反應會係點，而且時間得兩個月...

Drive In Ultra，我第一次聽已經好興奮，香港未做過唔知大家嘅反應會係點，而且時間得兩個月，我哋都有諗過會充滿困難，但我哋唔想因為難而唔做，因為香港人真係需要開心，而行內好多手足好需要開工。
準備呢個Show嘅過程係好緊張，呢個時期有咩唔係Plan住先、做住先呢？講真，即使到落實咗，個心都係好唔定，萬一要剎停咁點算？收緊咗限聚令咁點算？買咗飛嘅觀眾點算？但呢啲都唔係我控制得到，咁作為歌手最最最基本就係做好個rundown同練好啲歌，咁我就努力做好呢個本份，要對得住自己先對得住觀眾，其他嘅就交俾我身邊信任嘅團隊，多得佢哋我理少好多嘢，咁我就專心閉關每日練跑練歌練結他，所以要好好多謝一班好幫手好有心嘅人。

多謝主辦G Music Kenny Chow同德仔邀請我呢個專唱失戀歌嘅歌手做outdoor show，真係好大膽嘅兩個人！諗返起都覺得係創舉😅
多謝Jacky Lee同琳琳度咗個令大家咁有共鳴嘅show，有好多觀眾話佢哋第一首歌就開始流淚，證明佢哋拍啲片都好好睇！
多謝Jackey Cheung一個星期就砌起咗張海報，因為當時我哋趕住要做宣傳，所以佢同佢嘅同事好幫手日以繼夜咁畫畫畫，最後個成品大家都好鍾意，多謝你哋！
多謝所有台燈聲production同場地配合，呢三日show連埋綵排，咩天氣都遇過晒，地方又大，真係辛苦晒大家，感謝你哋！
呢個post最後要多謝你哋，係所有入場同Online嘅觀眾，多謝你哋咁支持，特別係最後一場入場嘅觀眾，感謝你哋一直冇離開，陪我開場淋到完場，好抱歉亦感激，我會好好記住呢一晚！#係愛呀

#係鄭中基加562個工作人員嘅功勞
#最緊要大家開心
#鳴謝post
#仲有㗎

---